DAKTILOSKOPIK HISOBLARNI YURITISHDA INNOVATSION TEXNOLOGIYALARDAN FOYDALANISH

Abstract

Daktiloskopik hisoblarni yuritish jinoyatlarni tergov qilish va sud jarayonlarida muhim ahamiyatga ega boʻlgan kriminalistik faoliyat turlaridan biridir. Soʻnggi yillarda raqamli texnologiyalar va innovatsion yechimlar yordamida daktiloskopik hisoblarni yuritish samaradorligi sezilarli darajada oshdi. Ushbu maqolada daktiloskopik hisoblarning zamonaviy texnologiyalar bilan boshqarilishi va avtomatlashtirilgan tizimlarning jinoiy izlarni tezkor aniqlash va taqqoslashdagi roli oʻrganiladi. An'anaviy qoʻlda yuritilgan hisob tizimlaridan farqli oʻlaroq, raqamli va bulutli texnologiyalar, biometrik usullar, sun'iy intellekt asosidagi algoritmlar orqali izlarni boshqarish jarayonlari yanada aniq va samarali boʻlib qolmoqda. Innovatsion texnologiyalar yordamida ma'lumotlarni saqlash, izlarni qidirish, solishtirish va natijalarni tahlil qilish jarayonlari optimallashtiriladi, bu esa jinoyatlarni ochishda va tergov jarayonlarida vaqtni tejash imkonini beradi. Shuningdek, ushbu maqolada daktiloskopik ma'lumotlarning xavfsizligi, maxfiyligi va ularni ruxsatsiz foydalanishdan himoya qilish borasidagi yangi texnologik yechimlar ham ko‘rib chiqilgan. Yakunda, innovatsion texnologiyalarni joriy etish orqali daktiloskopik hisoblarni yuritish jarayonlari samaradorligini oshirish va jinoyatlarni aniqlash tizimini yanada kuchaytirish mumkinligi ta’kidlanadi.