ICHKI ISHLAR ORGANLARIDA NARKOTIK VA GIYOHVAND MODDALAR BILAN BOG‘LIQ BO‘LGAN JINOYATLARNI FOSH ETISH

Abstract

Narkotik va psixotrop moddalar bilan bog‘liq jinoyatlar zamonaviy davrda jahon miqyosida dolzarb va xavfli muammo sifatida e’tirof etilmoqda. O‘zbekiston Respublikasi ham mazkur tahdidlardan xoli emas. Davlatimizda giyohvandlik vositalarining noqonuniy muomalasi, ularni tarqatish, saqlash, iste’mol qilish va kontrabanda yo‘llari bilan olib kirish bilan bog‘liq jinoyatlar soni ortib bormoqda. Ushbu holat ichki ishlar organlarining narkojinoyatchilikka qarshi kurashishdagi roli va vazifalarini yanada kuchaytirishni, zamonaviy texnologiyalar, tezkor-qidiruv faoliyatini optimallashtirish, xalqaro hamkorlikni rivojlantirish zaruratini yuzaga keltirmoqda. Mazkur maqolada ichki ishlar organlari tomonidan narkotik vositalar bilan bog‘liq jinoyatlarni aniqlash, ularni fosh etish va oldini olish bo‘yicha olib borilayotgan chora-tadbirlar chuqur tahlil qilinadi. Shu jumladan, tezkor-qidiruv va profilaktik ishlarning uslubiy yondashuvlari, statistik ko‘rsatkichlar, qonunchilikdagi islohotlar va jinoyatchilik dinamikasining xususiyatlari yoritiladi. Shuningdek, ichki ishlar xodimlarining kasbiy tayyorgarligi, ixtisoslashtirilgan bo‘linmalarning roli, zamonaviy texnik vositalardan foydalanish samaradorligi haqida fikr yuritiladi. Tahlillarga asoslangan holda, mavjud muammolar, jumladan, tezkor ma’lumot almashinuvi tizimining yetarlicha ishlamasligi, ayrim hududlarda malakali kadrlar tanqisligi, giyohvand moddalar oqimini aniqlashda texnik jihozlarning yetishmovchiligi kabi masalalarga e’tibor qaratiladi. Shuningdek, ilg‘or xorijiy tajriba asosida takliflar ishlab chiqiladi. Jumladan, “giyohvandlikka qarshi kurashish” milliy platformasini yaratish, profilaktik va rehabilitatsion dasturlarni kuchaytirish, fuqarolik jamiyati institutlarini jalb etish kabi yo‘nalishlar asosiy takliflar sirasiga kiradi. Maqola yakunida, ichki ishlar organlarining narkojinoyatlarga qarshi samarali kurashishi uchun qonunchilikni yanada takomillashtirish, tezkor-texnik vositalarni modernizatsiyalash, kadrlar salohiyatini oshirish va xalqaro tajribadan foydalanish zarurligi xulosa qilinadi. Shu bilan birga, giyohvandlikka qarshi kurashish nafaqat huquqni muhofaza qiluvchi organlar, balki butun jamiyat zimmasidagi vazifa ekanligi alohida ta’kidlanadi.