MAHALLA YETTILIGI XODIMLARINING IJTIMOIY PROFILAKTIKA FAOLIYATIDAGI HISOBDORLIK VA BAHOLASH TIZIMINI TAKOMILLASHTIRISH

Abstract

Ushbu maqola mahalla yettiligi xodimlarining ijtimoiy profilaktika faoliyatidagi hisobdorlik va baholash tizimini takomillashtirish masalalariga bag‘ishlangan. Jamiyatda huquqbuzarliklarning oldini olish va ijtimoiy barqarorlikni ta’minlashda mahalla yettiligi xodimlarining roli muhimdir. Shu bilan birga, ularning faoliyatini baholash va hisobdorligini tartibga solish dolzarb masalalardan biridir, chunki amaliyotda mavjud baholash tizimi ko‘pincha aniq indikatorlar va sifat mezonlarining yetishmasligi, monitoring mexanizmlarining noaniqligi va faoliyatning tizimli o‘lchanmasligi kabi kamchiliklarga duch keladi. Maqolada birinchi navbatda mahalla yettiligi xodimlarining vazifalari, huquqbuzarliklarning oldini olishdagi roli va jamiyatdagi ijtimoiy muhitga ta’siri o‘rganiladi. Shuningdek, amaliyotdagi baholash tizimlari, xodimlarning faoliyatini monitoring qilish va nazorat qilish tartiblari tahlil qilinadi. Tadqiqot natijalari shuni ko‘rsatadiki, mavjud baholash me’zonlari ko‘pincha samarali ishlamaydi va xodimlarning faoliyatini sifatli baholash imkoniyatini cheklaydi. Shu sababli, maqolada xodimlarning hisobdorligini oshirish, baholash tizimini takomillashtirish va ijtimoiy profilaktika faoliyatini tizimli tarzda rivojlantirish bo‘yicha tavsiyalar ishlab chiqilgan. Maqolada, shuningdek, xodimlarning ish faoliyatini baholashda sifat va samaradorlik ko‘rsatkichlarini hisobga olish zarurligi ta’kidlangan. Masalan, huquqbuzarliklarning oldini olishdagi profilaktik tadbirlar, fuqarolar bilan ishlash sifat ko‘rsatkichlari va jamiyat xavfsizligiga qo‘shgan hissasi tizimli tarzda baholanadi. Bundan tashqari, maqolada xodimlarning faoliyatini rag‘batlantirish va malaka oshirish dasturlarini joriy etish bo‘yicha tavsiyalar keltirilgan. Ushbu tadqiqotning natijalari nafaqat mahalla tizimi xodimlari uchun, balki huquqni muhofaza qilish organlari, ijtimoiy xizmatlar va davlat boshqaruv organlari uchun ham amaliy ahamiyatga ega. Takomillashtirilgan baholash tizimi jamiyatda huquqbuzarlikning oldini olish, profilaktika tadbirlarini samarali tashkil etish va mahalla xodimlarining professional faoliyatini rivojlantirishga xizmat qiladi.